Ысык-Көлдүн Тосор айылында 5-6-июлда "Омор Султанов - поэзиянын султаны" аттуу фестиваль өттү. Ага Кыргызстандын булуң-бурчунан акын-жазуучулар, адабиятчылар жана ыр ышкыбоздору катышты. Көл жээгинде акындын обондуу ырлары ырдалып, окулду.
Кыргыз эл акыны Омор Султановдун 90 жылдыгына арналган маданий иш-чараны "Тосор" коому уюштурган.
Фестивалдын алкагында жаш акындар арасында Жазуучулар Союзу, Маданият министрлиги жана Тосор коому уюштурган "Махабат ыры" сынагынын жеңүүчүлөрү аныкталды.
Анда кызыктыруучу 5 миң сом сыйлыкка Исамидин уулу Бектур жана Дүйшөнбек уулу Жакшылык ээ болушту. 3-орунду алган Элгиза Бусурманкул кызына 20 миң сом ыйгарылды. 2-орунду алган Таалайбек уулу Канатбекке 30 миң сом, 1-орунду алган Бектемир Асылбеков 50 миң сомдук сертификат менен сыйлады.
Жаш калемгерлердин ырларын акындар Сагын Акматбекова, Бурулкан Сарыгулова, Самидин Стамбеков, Мирлан Самыйкожо, Аида Эгембердиева баштаган акындар баалаган.
Омор Султанов 1935-жылы Тосор айылында жарыкка келген. Анын чыгармачылыгы өткөн кылымдын 60-жылдары эл оозуна алынган. "Сен жөнүндө поэма", "Чарчоонун жүзүнчү ыры" жана башка бир катар поэтикалык ыр жыйнактардын автору. Акын 2022-жылы 87 жашында дүйнөдөн кайткан.
"Тосор" коомун Айбек Сарыгул баштаган ишкерлер түптөгөн. Коом маданий иш-чараларды, поэзия кечелерин өткөрүүгө демөөрчүлүк кылып келет. (ST)
Шерине